Ерлікке толы жастық: Жәнібек Елеусов тағдыры.
Отан қорғаушылар күніне арналған еске алу кеші
1992 жылғы 7 мамырда Қазақстан Республикасының Қарулы Күштері құрылды. Бүгінде бұл күн елімізде Отан қорғаушылар күні ретінде аталып өтеді.
Қазақ даласы өз жерін жаудан қорғап, ел үшін жанын қиған талай батырларды дүниеге әкелді. Солардың бірі – Ұлы Отан соғысы жылдарында Кеңес Одағының Батыры атағын Ленин ордені мен «Алтын Жұлдыз» медалімен бірге алған ең жас қазақ жауынгері, гвардия қатардағы жауынгері Жәнібек Елеусов. Ол кезде бар болғаны 18 жаста еді.
22–23 қыркүйек аралығында түнгі уақытта Днепр өзенінің батыс жағалауына өту барысында ол өз бөлімшесімен бірге асқан ерлік пен жанқиярлықтың үлгісін көрсетті.
Жәнібек Елеусов соғыстың бүкіл ауыр жолын жүріп өтіп, туған еліне аман-есен оралды. Ол ұзақ та мағыналы ғұмыр кешіп, ел игілігіне еңбек етті. Оның ерлігі бүгінгі күнде жас ұрпаққа үлгі, рух берер тағылымға айналды. Бүгін Семей қаласындағы Невзоровтар отбасы атындағы облыстық бейнелеу өнері музейінің залында Политехникалық және Технологиялық колледждердің студенттері бас қосып, музей қызметкерлері мен студенттер бірлесіп әзірлеген осы батыр туралы әңгімені тыңдады. Музейдің кіші ғылыми қызметкері Сивашова Юлия Валерьевна – кештің жүргізушісі әрі ұйымдастырушысы – өмір жолы, деректі фильмдер мен өлеңдер арқылы көрермендерге, яғни өмір жолының бастауында тұрған жастарға, 80 жылдан астам уақыт бұрын дәл өздері сияқты небәрі 18 жаста болған жас батыр туралы әсерлі әңгіме өрбітті. Ол оның Отанға деген шексіз адалдығы мен елін қорғауға, қызмет етуге әрдайым дайын болған ерік-жігері туралы баяндады.
Кеш соңында Марат Сасановтың «Өлкетанушы олжаларынан» көрмесі бойынша экскурсия ұйымдастырылды. Тарихтың үнін жеткізген көне жәдігерлер өткен туралы әңгімені толықтырып, қатысушыларға заманалар арасындағы тірі байланысты сезінуге мүмкіндік берді.
Осылайша, бұл кездесу ерлікке толы тарих беттерін таныстырумен шектелмей, бейбіт өмірдің қадірін ұғындырып, Отан алдындағы жауапкершілік пен өткенге деген құрметтің маңызын жүрекке жеткізген тағылымды кешке айналды.
#7мамыр#Отанқорғаушыларкүні#Қазақстан#Қазақстанбатырлары#ЖәнібекЕлеусов #тарих #музей #Семей #патриотизм #жады #ҰлыОтансоғысы #мәдениет #мұра
