Татар өнерінің көрмесі
Абай облысы Семей қаласындағы Невзоровтар отбасы атындағы бейнелеу өнері музейінде халық шеберлерінің кескіндеме, графика және сәндік-қолданбалы өнер туындыларынан құралған бай бояулы көрме ашылды. Экспозиция татардың ұлы ақыны Ғабдулла Тоқайдың туғанына 140 жыл және ақын, Кеңес Одағының Батыры Мұса Жәлелдің туғанына 120 жыл толуына орай ұйымдастырылған. Көрме Татарстан Республикасының еңбек сіңірген өнер қайраткері Ғабдулхақ Ғабдуллович Ахунжановтың 75 жылдық мерейтойына арналған татар өнерінің XXVII халықаралық «Көзге Иртыш Моңнары» фестиваль-конкурсы аясында өткізіліп отыр.
Фестиваль қаладағы бірнеше мәдени алаңда өтіп жатыр, ал музейде ашылған көрме оның ең көрнекті бөлімдерінің біріне айналды. Экспозицияда балалар мен ересектердің еңбектері қатар ұсынылған. Акварельмен және майлы бояумен салынған картиналар гравюралармен, қарындашпен салынған суреттермен көршілес орналасса, моншақпен, зер жіппен кестеленген бұйымдар киізден жасалған қуыршақтармен және тоқылған бас киімдермен үйлесім тапқан. Мұнда сан алуан өнер туындылары мен қолөнер үлгілерін тамашалауға болады. Көрмеге қатысушылар өз шығармаларында төл мәдениетін, ұлттық дәстүрлерін, туған өлкенің әсемдігін және татар әдебиеті мен тарихынан шабыт алған бейнелерді арқау етеді. Әртүрлі көркемдік техника, әр автордың өзіндік қолтаңбасы мен тың шешімдері халық шығармашылығының байлығын, оның бүгінгі тынысын жан-жақты көрсетеді.
Көрменің мән-маңызын оған арқау болған ақындардың есімдері де айшықтай түседі. Ғабдолла Тоқай – қазіргі татар әдебиетінің негізін қалаушылардың бірі. Ал Мұса Жәлелдің, соның ішінде Ұлы Отан соғысы жылдарында жазған өлеңдері ерлік пен қайсарлықтың, өз ұстанымына адалдықтың жарқын үлгісі ретінде тарихта қалды. Олардың шығармашылығы адамдарды әлі де біріктіріп, ана тілінің құдіретін, мәдени жады мен рухани құндылықтардың маңызын еске салады.
Көрменің ашылу салтанаты да жарқын оқиғаға айналып, көптеген қонақтың назарын аударды. Көрермендер мен қатысушыларды Қазақстан Республикасының еңбек сіңірген қайраткері, Қазақстан Республикасы Суретшілер одағының мүшесі, Татарстан Республикасының халық суретшісі, Ғабдулла Тукай атындағы Татарстан Республикасы Мемлекеттік сыйлығының және Қазақстан Республикасы Мемлекеттік сыйлығының лауреаты Камиль Валиахмедұлы Муллашев, Қазақстан халқы Ассамблеясының мүшесі, Татарстан Республикасының еңбек сіңірген өнер қайраткері, «Хак» Ертіс өңірі татарлары мен башқұрттары одағы» қауымдастығының президенті Ғабдулхақ Ғабдуллович Ахунжанов және музей директоры, Қазақстан Республикасының еңбек сіңірген қайраткері, өнертанушы Татьяна Александровна Стромская құттықтады.
Көрме бірнеше күн ғана жалғасады. Бұл – өнер сүйер қауым үшін татар халқының бай әрі өзіндік ерекшелігі мол мәдениетімен танысуға тамаша мүмкіндік. Мұнда өткен мен бүгін, әдеби мұра мен авторлардың жеке көркемдік көзқарасы тоғысады. Ал өнер әртүрлі ұрпақ пен ұлт өкілдерін біріктіретін, баршаға түсінікті ортақ тілге айналады.
#НевзоровМузейі #ТатарӨнері #КөзгеИртышМоңнары #ҚазақстанМәдениеті #Семей
