Қалдықтардан өнер туындысын жасауға бола ма? Ересектерге арналған «Сурет салуды үйренеміз» білім беру тобының қатысушылары енді бұған сенімді түрде «иә» деп жауап береді.

«Таза Қазақстан» акциясы аясында олар экологиялық өнермен танысып, апсайклинг бағытындағы суретшілердің рөлін байқап көрді — яғни қажетсіз заттарға жаңа өмір сыйлап, оларды әсем әрі ерекше дүниелерге айналдырды.

Ғылыми-зерттеу және көрме жұмысы бөлімінің маманы Г.Д. Сарсембина қарапайым материалдардың да жаңа өмірге ие бола алатыны жайында әсерлі әңгіме өрбітті. Қатысушылар табиғатқа жанашырлықпен қараудың маңызын талқылап, бұрын қажетсіз болып көрінген заттардың өзінен де сұлулық пен жаңа мүмкіндіктерді көре білудің мәнін түсінді.

Ал одан кейін нағыз шығармашылық сәт туды. Қарапайым ғана қарындаш жоңқаларынан бірте-бірте ерекше бейнелер пайда бола бастады: балықтар, көбелектер, тіпті портреттер. Кәдімгі ұсақ бөлшектер қиялмен үндесіп, күтпеген жерден шағын өнер туындыларына айналды. Сол сәтте қатысушылар шығармашылықтың құпиясы қымбат материалдарда емес, дүниеге өзгеше көзқараспен қарай білуде екенін сезінді. Өйткені кейде ең қарапайым заттың өзі жаңа өмірге ие болып, сұлулықтың бір бөлшегіне айнала алады.

#ТазаҚазақстан

#ЭкоӨнер

#Апсайклинг

#ҚалдықтарданӨнер