Аймақтық мәдениет саласының өкілдері мен мәдениет басқармасы басшыларының кездесуі

Невзоровтар отбасы атындағы облыстық бейнелеу өнері музейінде аймақтық мәдениет мекемелерінің өкілдері мен Абай облысының мәдениет, тілдерді дамыту және архив ісі басқармасының бөлім жетекшілерінің кездесуі өтті.

Кездесу музейдің тарихи тынысы сақталған акт залында ұйымдастырылып, XIX ғасырда қаладағы алғашқы театр болған бұл орынға ерекше мән берді, еске алу мен мәдениетке деген құрметтің символына айналды.

Кездесу облыстық мәдениет басқармасы ұйымдастырған іс-шаралар кешенінің аясында өтті. Оған екі күндік, жасанды интеллект қолдану мәселелеріне арналған оқу семинары, қаланың әртүрлі мәдени алаңдарында өткізілген көптеген кездесулер, сондай-ақ мәдениет саласында ерекше еңбегі мен табыстары үшін қызметкерлерді марапаттау шаралары кірді. Марапатталғандар арасында Невзоровтар отбасы атындағы облыстық бейнелеу өнері музейінің директоры Стромская Татьяна Александровна да болды, оның кәсіби қызметі мен басқарушылық үлесі облыс басшылығы тарапынан жоғары бағаланды.

Музейдегі кездесу барысында өңірдің қазіргі мәдени өміріндегі өзекті мәселелер қаралды, атқарылған жұмыстың қорытындылары шығарылды, сондай-ақ мәдениет саласын дамытудың перспективалық жобалары мен басым бағыттары талқыланды. Арнайы көңіл мәдениет мекемелерінің қызметін жаңғырту, жаңа жұмыс формаларын енгізу және цифрлық шешімдерді қолдану мәселелеріне аударылды.

Ресми бөлімнен кейін кездесудің қатысушылары «Ұлы Даланың қазынысы» атты көрмені тамашалады, ол қазіргі таңда қаладағы ең көрнекті әрі мәнді мәдени шаралардың бірі саналады. Қонақтарға қазақ және орыс тілдерінде экскурсия ұсынылды. Музей қызметкерлері — Абешова Жанар Жумагазиновна мен Сивашова Юлия Валерьевна өңір қорғандарынан табылған бірегей археологиялық жәдігерлер, алтын мен қола бұйымдары арқылы қонақтарды тарихпен, Ұлы даланың бай мұрасымен сусындатып, Қазақстанның жетекші ғалымдарының жасаған ғылыми реконструкциялары арқылы өткеннің көркем бейнесін паш етті.