Музейдегі классикалық музыка концерті
Семей қаласындағы Невзоровтар отбасы атындағы облыстық бейнелеу өнері музейінде классикалық музыка концерті өтті. Музейде вокалдық миниатюралар концерті ұйымдастырылып, оның тыңдаушылары Өнер сүйер қауым клубының мүшелері болды. Бірнеше жылдан бері әсемдікке құштар жандар күзден көктемге дейін айына екі рет музейде бас қосып келеді: өнер туралы дәрістер тыңдайды, концерттерге қатысады, шеберлік сабақтарына қатысып, көрмелерді тамашалайды, өз ойларымен бөлісіп, көрген-білгендерін талқылайды, жаңа дүниелерді ашады. Кезекті кездесу классикалық музыкаға арналды және оған Семей қаласындағы Мұқан Төлебаев атындағы музыкалық училище «Академиялық ән айту» және «Арнайы фортепиано» бөлімдерінің оқытушылары мен студенттері қатысты. Концерт бағдарламасы жанрлық әртүрлілігімен ерекшеленіп, орыс және Батыс Еуропа классикасының шығармаларын, сондай-ақ халық музыкасын қамтыды.
Тыңдаушылар назарына Николай Римский-Корсаков романсылары, Александр Даргомыжскийдің «Русалка» операсынан ария, Фридерик Шопеннің фортепианолық ноктюрні, Георг Фридрих Гендельдің «Dettingen Te Deum» кантатасынан үзінді ұсынылды. Бағдарламада Вольфганг Амадей Моцарт пен Джузеппе Верди шығармалары ерекше орын алды. Академиялық репертуармен қатар қазақ шығармалары да орындалды – Абай Құнанбайұлыдың романсы, халық әні «Ақдариға» және Латиф Хамидинің «Қазақ вальсі».
Концертке оқытушылармен қатар жоғары курс студенттері де қатысты. Романс, ариялар мен халық әндерін Назерке Сыдыкова, Айгерім Аширова, Боранбай Қалибаев, Жаннұр Бектуганова, Назым Амангелдиева, сондай-ақ «Академиялық ән айту» бөлімінің студенттерінен құралған вокалдық ансамбль орындады. Залдың камералық атмосферасы тыңдаушыларға классикалық музыканың сұлулығы мен эмоциялық тереңдігін нәзік сезінуге мүмкіндік берді. Ғасырлар сүзгісінен өткен бұл өнер бүгін де өзектілігін жоғалтқан жоқ. Ол әлі де адамдарды біріктіріп, әрбір жүректен өз үнін таба біледі.
Өнер сүйер қауым клубы өз жұмысын жалғастыруда. Екі аптадан соң оның қатысушылары жаңа әсерлер мен жаңғырықтарға толы тағы бір кездесуде қайта табысады. Музей қызметкерлері әрбір басқосуды айрықша мәнге бөлеп, мазмұнын барынша түрлендіруге ұмтылады. Алдағы кездесулер көп емес — олардың қандай тақырыпқа арналатыны әзірге жұмбақ күйінде. Бірақ бір нәрсе анық: әрбір кездесу жүрекке жол тауып, жан дүниеге жаңа бір сәуле сыйлары сөзсіз.
#музей#классикалықмузыка#әншілік#романс#ария#өнер#өнерсүйерқауымклубы
