«Үйге оралу».
Невзоровтар отбасы атындағы музейдегі бірегей көрме.
Біз олармен иық тіресе қатар тұрғандаймыз. Оның бөлмесінің есігін ашып, көзіне көз тігеміз. Тіпті нық та сенімді, іскер үнін де естігендей боламыз. Ал оның әйелінің даусы ше? Өктем, өз дегенінен қайтпайтын жанның үні. Онымен тілдескіміз келеді, бірақ жүрексініп қаламыз.
Ол – осы үйдің қожайыны Фёдор Степанович Степанов. Ал оның жұбайы, тұрмысқа шыққаннан кейін Степанова тегін алған Евгения Петровна Казанцева. Осыдан бір жарым ғасыр бұрын олар дәл осы үйде ғұмыр кешкен. Ал бүгін бұл үйде біз тұрып жатырмыз.
Міне, бүгін олар өз үйлеріне қайта оралды… Арада бір жарым ғасырға жуық уақыт өткенде.
Абай облысы, Семей қаласында орналасқан Невзоровтар отбасы атындағы облыстық бейнелеу өнері музейінде «Фёдор Степанов. Ұзақ күткен кездесу» атты бірегей көрме ашылды. Бұл – таңғажайып, тіпті сенгісіз оқиға! Өйткені соңғы 27 жылға жуық уақыт бойы мұндай көрме ашылады деп ешкім ойламаған еді!
Музейдің тарихы XIX ғасырда салынған көне зәулім үймен біте қайнасқан. Бұл – көпес Фёдор Степанович Степановтың үйі. Оның есімі мұрағат құжаттарында сақталып, игі істері тарих беттерінде қалған. Музей қызметкерлері экскурсиялар барысында көпес Степанов туралы келушілерге үнемі әңгімелеп отыратын. Алайда осы жылдар бойы оның қандай адам болғаны, сырт келбеті мен отбасы жайлы ешкім ештеңе білмеді.
Міне, ақыры, олар өз үйлеріне оралды. Фёдор Степановтың ұрпағы Александр Васильевич Яненко музейге отбасылық мұрағатын – фотосуреттерді, майлы бояумен салынған портреттер мен қарындашпен салынған суреттерді табыстады. Енді осы бейнелерден көпестің өзін, жұбайы мен балаларын көруге болады.
Бір кездері олар осы бөлмелерде жүріп, осы ауамен тыныстап, талай игілікті іс атқарған. Көпес Степанов жомарт меценат, қайырымдылық жасаушы, өнер жанашыры ретінде танылған. Қалада алғаш рет дәл осы үйде рояль пайда болған. Қабырғаларға еуропалық шеберлердің картиналары ілініп, кең залдарда бал кештері өткізілген. Сондай-ақ қаладағы алғашқы үй театры да осы шаңырақта ашылған.
Бір кездері олар үшін мұның бәрі үйреншікті өмір еді. Уақыт өте келе сол өмір тарихқа айналды. Ал біз үшін бұл – ғасырлар қойнауынан жеткен өткенмен жүздесу, уақыт жалғаған тірі кездесу.
#НевзоровтарМузейі #ФёдорСтепанов #СемейТарихы #МәдениМұра #Көрме
