Музей туындысы оқушыны жеңіске жетелеген бейнероликке шабыт берді

Невзоровтар отбасы атындағы Облыстық бейнелеу өнері музейі тағы да оқушылардың зерттеушілік және шығармашылық жаңалықтары бастау алатын алаңға айналды. Музейдің қор жинағындағы суретші Н. И. Яковлевтің «Ескі Семей» атты картинасы №28 мектептің 6 «В» сынып оқушысы Мария Аюпованы ерекше қызықтырып, РҒПО «Дарын» ұйымдастырған «Қандай көркем – менің туған өлкем» облыстық байқауында бірінші орын алған бейнероликтің сюжеттік өзегіне айналды.

Мария музей экспонатына қаланың өткенін үнсіз сақтап тұрған тірі куәгердей қарайды. Картина Семейдің кешегі болмысы – оның көшелері, сәулеті мен рухани ахуалы туралы әңгімеге бастау нүктесіне айналады. Мұндай көзқарас музейдің өңірдің көрнекі жадысын сақтайтын әрі оны жаңаша пайымдауға жол ашатын кеңістік ретіндегі айрықша маңызын айқын көрсетеді.

Музейдің қор жинақтары оқушылардың жобаларында жиі пайдаланылғанымен, Марияның жұмысы бір қырынан ерекшеленеді: ол музейдегі өнер туындыларының жай ғана дерек көзі емес, қиялды оятып, шығармашылық ізденіске жетелейтін қуатты бастау бола алатынын көрсетті.

Жоба жаһандық құзыреттер пәнінің мұғалімі Гульжан Алпысбековна Батинаның жетекшілігімен дайындалып, ол зерттеушілік көзқарасты қалыптастыруға және бейнематериалды тұтас, мазмұнды дүние ретінде құрастыруға қолдау көрсетті.

Бұл жұмыстың тарихы музейдің мәдени әрі білім беру кеңістігі ретіндегі маңызын тағы бір мәрте айқындайды: өткен дәуір туындылары жаңа ұрпақты өз өлкесін тануға, шығармашылыққа және терең пайымға шабыттандырып келеді.